بصراحه كيف تتعامل مع اختك؟؟؟؟

[خادمة المنتظر]

بصراحه كيف تتعامل مع اختك؟؟؟؟


المشهد الاول:
ساره:يبه أبي اروح للسوق..

الابو: وأنا وش علي منك ..هذا اخوانك عندك ..روحي قولي لهم..

===

المشهد الثاني:

(تروح سارة لاخوها الصغير ..بدر.. )

ساره: بدر ممكن يعني تتكرم وتوديني السوق ؟ والله ضروري..

بدر: يوووووووووه فاضي لك انتي..مشغول..

سارة: بدر تكفى ..والله بروح أتقضى للعيد ..مايمديني الحين معد بقى عليه الا 3 اسابيع..

بدر: قلت لك مشغووول>>يضغط عالكلمه..

(يدق جوال بدر)

بدر: هلاااااااااااا والله بابو حميد ..وينك يارجال ..عاش من سمع هالصوت ....

عاش من سمع هالصوت........وشلون ..تبي تشوفني الحين ؟؟ ......ابشر ..ما طلبت شي............. لا ..لا ..يارجال لامشغول ولا شي>>شف النذاله وهو توه يقول لاخته اني مشغول(!) ....

(يطلع بدر من غرفته ومعه غترته..عشان يروح لصديقه)

بدريكلم ساره:يله اطلعي برا الغرفه بقفلها انا طالع الحين>>كن فيها كنز!!

ساره: طيب خذني على طريقك....

يقاطعها :اقووووول والله غلطان اللي يعطيكم وجه >>أي وجه ابي افهم بس!!

(يمشي بدر بسرعه ويركب سيارته ويروح)

===

المشهد الثالث:

(تروح ساره لاخوها الكبير عبدالله)

ساره: عبالله ..توديني للسوق؟؟

عبدالله: سوير..انتي عارفه اني مالي دخل بهالسوالف..روحي قولي لاخوانك>>وانت وشو؟اخو الجيران مثلا!!

===

المشهد الرابع:

(ترجع ساره لابوها)

ساره:يبه شف عيالك والله يطفشون الواحد..يعني اطرهم السوق؟؟

الابو:قلتيلهم كلهم وعيو؟؟

ساره:قلت لبدر وعبدالله..

الابو:طيب شوفي أخوك نايف ..توه جاي للبيت ..حاولي فيه وان شاالله انه بيوافق..

===

(تروح ساره الطراره>>عفوا المسكينه لاخوها نايف وهي تقول في نفسها.: لا نايف حبيب ..ومحد في البيت يفهمني كثره..ان شاء الله ربي يطرح فيه البركه ويوديني

ساره: نيوفي ..يا بعد هالدنيا ..وش رايك لو نطلع الحين للسوق..منها نتمشى ومنها انا نغير جو..<<تقوله كذا ..عشان نايف رمنسي ويحب الكلام الحلو..

نايف:اممممممممممم ..والله فكرة ..حتى انا مليت من طلعات الشباب..بس ابي افهم شي واحد ..انتو يالحريم وشوله تحبون السوق؟؟

ساره:انا ما احبه بس..تعرف العيد قرب ..وابي ابدا من الحين موب زي العام..انزنق على اخر شي..

نايف:يله..يله..رحمتك ..روحي البسي عبايتك فيما البس ثوبي..

(ساره من كثر فرحتها قامت باست اخوها)

وهي تقول :صدق؟؟>>كنه بيوديها الجنه

نايف:ايه يله بس بسرعه..

(سارهوهي تروح ..نايف يطالع اخته وشلون فرحانه ..وتخنقه العبره>>
خخخخخخخخخخخخ

لبست ساره باسرع وقت وطلعت هي واخوها ..

وعند الباب ..دق جوال نايف

نايف: هلابك.........انت عند الباب؟؟..............ايه هلا والله فيك..حياك الله ...يله ..يله دقيقه وافتحلك..

نايف: يووووووووه معليش سوسو..مواعد واحد من الشباب.. ونسيت ما اقول لك ..يله بسرعه..هو عند الباب.. روحي للمطبخ جهزي القهوه والشاهي على بال ما اقلطه..بسرعه لا تتاخرين علي بالقهوه..

(راحت ساره المسكينه..وفصخت عبايتها ..ودخلت المطبخ..تسوي لاخوها اللي طلبه)وهي تقول في نفسها:مهيب عاده !!

====






^
^
^
^
^

كل هذي مقدمه


الزبده في الموضوع







تعامل الاخ مع اخته في مجتمعنا ..كيف تقيمونه..

هل انت راضي عن تعاملك مع خواتك .وانتي بعد راضيه عن تعامل اخوك معك؟؟؟

هل تعطي اخواتك حقهم من وقتك وتجلس تدردش معهم ولا لا؟؟

انتي كاخت وانت كاخو..هل لديك احد من اخوانك قريب لقلبك اكثر من غيره..والا كلهم سوا؟؟

طبعا بما اني نقلت الموضوع بجاوب انا بالبداية..
عندي أخ واحد علا قتي مو شي معاه
وعندي أخوات 3 أحبهم موت وعلاقتي قويه معاهم



للامانة منقول..
لكي تشاركوني ارائكم..

تحياتي خدومه

[الحور]

موضوع حلووو لأنه يتكلم عن أخوووووووي :p


وانتي بعد راضيه عن تعامل اخوك معك؟؟؟
إمممممم شوفوا أحيانا يزفني و أحيانا يصير حنون مثله ما فيه
آنه أحب هالشخصيه مثلا لمن يدخل البيت
على طول سيده على غرفتي: إنتي رجعتي متى
آنه مالي خلقه: قبل شوي
يقول: إنزين ضحكي إشفيج معصبه أحد زافج
آنه: لاااا
آهوه: تبين تبجين أدري .. قولي شفيج أحد زافج تراا أكفخه لج هههههه
آنه: مشكوووووووووور بس مافيني شي غصب تسوي فيني شي
<<<<<<<< إهني حنون علي وااااايد و يقعد يسولف و ما أدري شنو

أما لمن أقول كلمه ما تعجبه على طول يعصب
مثلا
آنه: راااااح أزوجك ذيج البنيه إلي مافي أحلى منها
أهوه مستانس: منوو؟؟
آنه: بنت .................
البنت إلي مطفرته فيها ما يحبها خير شر بس جذي أحب أطفره لوووووووول
:p

أهوه يطالعني بعصبيه: إنتي شكلج اليوم ما بجيتي تبين أحد يبجيج
آنه: لووووووووول ... آسفه ما أعيدها
أهوه: عبالي بعد يلا قومي طلعي بره
<<<<<<<<<<<<< معصب

و بالعكس ما أحبه دايما يعصب و لا دايما حنون أبيه بين البين :p
فآنه راضيه على تعامله معااي

حتى لمن سافر مرتين العمره نساا إنه عنده أخت و بالأخير قام يدقدق علي و آنه معطيته طنااااااااش .. آخر شي راضاني لوووووول تدرون بشنووو راضاني بميداليه تتعلق بالتلفون قلب و داخلها الحور << بعد جبدي و الله


هل لديك احد من اخوانك قريب لقلبك اكثر من غيره..والا كلهم سوا؟؟


إيييي هذا أقرب لي من أخوي الثاني :)

[خادمة المنتظر]

هههههههههههههههه
الله يخلي ألج حبيبتي ويحفضه
والله خوش أخو شتردين بعد
راح أحسده هههه

[أم البنين]

موضوع جدا جميل خادمة المنتظر ويستحق الرد
احنا 3 خوات واخ واحد
الله يخليه لى ولا يحرمنى منه فديته ابو على
انا اقرب اخت له واهو ايضا اقرب اخ لى اقرب حتى من خواتى
مايقصر لو اقول له اي شئ بروح اى مكان( مع انى عندى سيارة ، بس احيانا ما ادلى المكان) او اي خدمه مايقصر يشاورنى وياخد رايي فى كثير من الامور معظم اسراره عندى وانا بعد كتاب مفتوح مع اخوي اصارحه بمافى قلبى من دون تردد
الله يخلى لي ولا يغير علينا يارب

طرح موفق وبانتظار جديدك غاليتى

[منارة المجد]

:)

اخوووي صغير ماعندي الا هو ,,

بالنسبة لي تعاملة معاي هم يقهر :D عنوووووووودي بشكل غير طبيعي ..

و الله يساعدكم واحد و مو متحملتنه خخخخخخخخ

[الحور]

هههههههههههههههه
الله يخلي ألج حبيبتي ويحفضه
والله خوش أخو شتردين بعد
راح أحسده هههه




تسلمين حبيبتي :)
الله يخليه لي :p
و لااااا تحسديني لوووووووول اليوم معصب علي :p

[خادمة المنتظر]

هههههههه
أم البنين
شكرا لتواجدك هنا
مناره
منوره صفحتي
الحور
ههههههه
بعد ميفيد حسدته

[بو يعقوب]

السلام عليكم موضوع حلووووو

انا مو من اللي في الموضوع


يمكن لان خواتي كلهم اكبر مني

بالنسبة للبنات عموما اذا رخيت وياهم تضييييع واذا غلضت عليهم بعد تضييييع

فخير الامور اوسطها

انا صارت عندي نظرية :p

وهي


لاتطاوع مرة الا اذا عرضت الموضوع على عقلك

[اللؤلؤة المكنونة]

بسم الله الرحمن الرحيم

اللهم صل على محمد وال محمد وعجل فرجهم

عندي سبعة أخوان بالصلاة على محمد وال محمد

بس أخوي اللي أممممممممممم خلوني أشوف كم ترتيبه فيهم

السادس طلع خوووب قبيلة أحنا ههههههه

هذا أقرب أنسان لي يعني حتى المواضيع الساخنة

نو برابلوم نتحجى فيها ماكو مشكلة آنا أكبر منه بجم سنة

وهو عمره 20 سنة وعلى قلبي ينحط على الجرح ويبرى

وأما أخواني الباقي العوض على الله فيهم

عندي أخوي متزوج ومعانا بالبيت ومانشوفه بالسنة والشهور

وولده راح يتزوج ولا قال لنا رغم أنه ماكوا فاصل بينا وبينهم

بس مادري ليش قلبه قاسي

ودوم يطلع مع مرته البحر وآنا ولا مرة قالي روحي معانا

دائمآ حكرة بالبيت ساعات أنقهر منه لهدرجة ماعنده أحساس

ولا شي والله شي يحز في خاطري ساكن معانا ووجوده وعدم وجوده واحد

حتى أذا مرضت أروح مع السواق الغريب ولا أقوله

وأذل نفسي له صحيح أنه مابيقصر بس صراحة مانشوفه

ولو شفته أنخش عنه لأني أحسه غريب مايقعد معانا كلش

ولا يجي يسأل محتاجين شي ولا لا والله حرام حرام

تعبانة حييييييييل منه ودنا برجال يهتم فينا

وهو الرجال في البيت بس للأسف الشديد ماله معنى

[خادمة المنتظر]

سيد فاضل خوش نضريه
ههههههه
همس العشاق
حبيبتي ميخالف خطيه أخوك الكبير المهم موجود بالبيت كخيمه عليكم
أهم شي يضل سالم
ويعوض الك أخوك السادس خوش رجال شايل بيتكم وشايل عاهات أخوه
ربك ما خلاهه بس على الكبير عوضاكم بسته غيره
وبيهم البركه أن شاء الله

[روح البتول]

واللـه اناا اقرب انسااانه عندي وااهي اللي توديني
الاماااكن اللي ابيهااا اختي الكبيره :)

والله اهي الي افتح لهاا قلبي لي تضاايقت ووكل شي ..

بس اختي الثااااااانيه ياابوووووي يابوووووي


هذي كاااارثه من الاعناااد امبي عنيييده بشكل مووطبيعي ..

آناا هذي بصرااحه مووايد معاهاا والحين اهي ورااي قاعده تقراا كلاامي :D

يعني جد اذاا عاندت عااندت واخواااني اناا كلهم عاادي معااهم وكل شي يسوولي الحمدلله :)

بس اقرب شي لي اختي الكبيره


وطبعاا تووني بجوااب على اسئلتج :D

هل انت راضي عن تعاملك مع خواتك .وانتي بعد راضيه عن تعامل اخوك معك؟؟؟
اييي الحمدلله وااايد رااضيه :)

هل تعطي اخواتك حقهم من وقتك وتجلس تدردش معهم ولا لا؟؟
ايي حيييل

انتي كاخت وانت كاخو..هل لديك احد من اخوانك قريب لقلبك اكثر من غيره..والا كلهم سوا؟؟

مثل مااقلتلج اختي الكبيره اهي اقرب وحده لي وواهي الوحيده اللي فاهمتي وفاهمه سواالفي :D


يسلموو اختي وعساا الكل دوووم وياا بعض وومااايفرقكم لاحبيب ولاا عدوو :)

[خادمة المنتظر]

الله يخلي الكبيره لك والصغيره علميهه تكلمي معاها وجهيلها نصايح
شكرا على المرور غاليتي

[أريج الورد]

موضوع جميل عزيزتي
انا الحمدلله الله رزقني باربع اخوان كلهم اكبر مني و الحين كلهم متزوجين ما عدا واحد
شوفي حبيبتي انا اشوف علاقة الاخوان لازم تكون حميمة و حلوة لكن بحدود
يعني بصراحة اخواني الشباب يعني احس ان في امور لو شنو يصير ما اقدر اقولهم اياها و احس في حاجز دايما بيني و بينهم
ما ادري اذا هالشي صح ام لا بس هاذه نظام بيتنا
يعني اخواني الحمدلله كلهم طيبين معاي و يساعدوني و خافون علي و يغارون علي وووو بس يعني عمري ما قدرت اتكلم مع واحد منهم كلام شخصي او افتح لهم قلبي
مرات حسيت اني محتاجة لهالشي بس استحي منهم
مرة وحدة بس فتحت قلبي لاصغر واحد من اخواني عمره 24 و وايد احبه بس للاسف ما شفت تقبل في هالشي و حسيت انه ما وده نتكلم وايد في امور شخصية و حساسة
اما اخواني الكبار فالحمدلله كل واحد لاهي مع بيته و زوجته و مع ذلك ما يقصرون و صج ان ظروف الدنيا صعبة و مرات ما نشوفهم الا بالاسبوع مرة او مرتين لكن اهم طيبين و كلللش يحبوني
بس عندي واحد من اخواني قبل لا يتزوج صارت فترة وايد كنت اخاف منه لانه ما كان يتفاهم و وايد يعصب علي و غيور بشكل خيالي
بس الحمدلله عقب ما تزوج علاقتنا صارت زينة و عادية
اخوي الي كان يدرس بامريكا عقب ما رج حسيت ان بجد كاننت عندي درة ثمينة و غايبة عني لفترة و بجد عوضنا بهالفترة عن غيابه و مع انه متزوج بس اكثر واحد نشوفه و اكثر واحد يساعدني و يدرسني و يطلعني و يتغشمر معاي وووو الله لا يحرمني منهم كلهم
و حاليا ادعي من كل قلبي الله يرزق اخوي الصغير وحدة بجد تستاهله لانه ماكو منه اثنين و فعلا وايد اخاف عليه و ودي ياخذ احسن وحدة بالدنيا..الله يرزقه ان شاءالله و عسى الله يقلل من حساسيتي اتجاهه و ما اغار من مرته خخخخخ
و الحمدلله على كل حال
و فعلا الاخ نعمة و صدقوووني يا بنات كثر ما تشوفون جفا من الاخ او قلة اهتمام او تطنش صدقوووووووني و مستعدة احلف ان اذا لا سمح الله صابتكم مشاكل بعدين مع الزوج او اي مشكلة كبيرة لا سمح الله ماااااااكو احد راح يوق معاكم و راح يساعدكم و يخاف عليكم اكثر من اخوكم و هاذه شي اقوله لك و انا واااثقة
فكثر ما نشوف منهم اذى و جفا احيانا لكن لازم ندرك انهم اقرب الناس لنا بهالدنيا و ما راح يتعوضون ابدا

[خادمة المنتظر]

أختي العزيزه
الله يخليلج أخوانج علاقتج بيهم وااااااايد زينه
وشكرا ع النصيحه
طبعا الأخوان يحبونه لكن عدهم شوي ههههه
وأشكرك مره أخرى لزيارتك البهيه

[بنت البحارنه]

السلام عليكم

بصراحة اخواني الكبار البون لي طلباتي
وانه بعد البي لهم طلباتهم بس خواتي اقرب
منهم لأنهم بنات وتعرفين تتعاملين معاهم
بسهولة اما اخواني الصغار احيانا نعم واحيانا لا
ومشكورة خيتو على هالموضوع الحلو .




تحيــــــــــــــــــــــــاتي...........

[بحرانية اصيلة]

السلام عليكم

والله اني احترم اخواني وخواتي

وإذا يبغون من شي وأقدر اسويه ما أبخل عليهم

يعني أقوم اسويه

بس الاقرب لي خواتي لانهم بنات وأعرف شلون اتعامل معاهم

اما عن اخواني الحمد لله يلبون طلباتي إذا يقدرون


يسلموا على الموضوع

تحياتي ..