للمقبلين على الزواج و المتزوجين ( تفاهم بين الرجل و المرأة )

[متيم ب علي]

بسم الله الرحمن الرحيم
اللهم صلي على محمد وعلىآله الطيبين الطاهرين وعجل فرجهم ياكريم

السلام عليكم ورحمة الله و بركاته
أخواني الأعزاء ,, كثيراً منا من يقول بأنّ حريم هالزمن غير عن حريم قبل ,, العادات و التقاليد تغيرت ,, مجتمعنا إنفتح عالمجتمعات الغربية ,,
توجهاتنا و أفكارنا تغيرت بكل شي ,, من الأمور اللي لاحظتها و شدت إنتباهي عدة تسؤلات أحب أطرحها لكم و نكمل مشوار الموضوع معاكم و إن شاء الله نفيدكم و نستفيد منكم ,,

أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟

أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه .

المهم
ماهو تفكيركم بهذا الشأن وماهو جوابكم ؟ .. وهل سيكون هناك نتائج سلبية ( حسب تفكير الرجل و المرأة ) ؟

كيف ستعامل زوجة المستقبل يا أيها الرجل ؟ ,, وكيف تودين أن يعاملك زوجك يا أيتها المرأة ؟

إن شاء لله نشوف مشاركاتكم عشان نستفيد منكم أخواني ,,

[بو يعقوب]

السلام عليكم ورحمة الله وبركاته

موضوع حساس ومفيد

وانا متشوق اشوف اراء الاعضاء علشان اجس النبض


مع سؤالك الاول


أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

والله تحيرت

بس تدري

انا ما يطاوعني قلبي اخليها تشتغل في مكنا فيه رجال خصوصا انها مو محتاجة لانها قيمتها في بيتها

وممكن الرجال يغار من مرته اذا كان راتبها اقوى من راتبه

انا اشوف الصبيان شيسوون في المعهد

بس البنية المحترمة مايقولون عنها شي

لكن النسوان ما يحاسبون لروحهم عدل

لذا

مايحتاج اعور راسي

ما ابغيها تشتغل في مكان مخلوط

غيرتي ماتسمح :)

=========================

بالنسبة لراتب المرأة

انا ما أؤيد ان الرجال يمسك راتبها

المفروض يخليه عندها

بالمقابل

لازم المرأة تراعي صفة الرجولة

وجود راتب لايميزها عن الزوجة اللي ماعندها راتب

يعني

لاتحسسين زوجش انش مستغنية عنه وانش تقدرين تسوين اللي تبينه وهو ماله خص بس لانها فلوسج

ومن جهة اخرى الرجال لازم ما يتمنن ولا يتشرط واجد لان هالشي يضايق المرأة



كيف ستعامل زوجة المستقبل يا أيها الرجل ؟ ,, وكيف تودين أن يعاملك زوجك يا أيتها المرأة ؟


باللين والحزم والحب

وكل في موضعه

ومستحيل اظلمها

هذا وصلى الله على محمد واله الطيبين الطاهرين

موضوعك حلوو

ننتظر الهواش :p

[بو يعقوب]

يرفع :)

.........................

[أريج الورد]

اللهم صل على محمد وال محمد و عجل فرجهم..
عنوان الموضوع للمقبلين على الزواج و المتزوجين و انا مو وحدة منهم لكن مجرد ابداء راي...:)


أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

بصراحة انا برايي يفضل المراة ما تشتغل اذا ما كان في حاجة.. المراة شغلها الاول و الاهم اهو تربية الاطفال و تدبير امور منزلها..لكن و للاسف و هاذه الواقع و لازم نواجهه ان عمل المراة اصبح ضرورة لااابد منها..خصوصا اذا كان راتب الرجل راتب موظف..بهالزمن واايد صعب يعيشون على راتب واحد و بدون مشكلات مادية..فاهني تضطر المراة تعمل..خصوصا اذا كانت دارسة و باذلة جهد..فاكيد ما راح تخلي هالتعب يروح هدر...


وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟
الرجل لازم ما يغار من عمل زوجته حتى لو في مكان مختلط لان المراة المحترمة و الشريفة راح تصون نفسها في اي مكان و تحت اي ظروف..لازم تكون بينهم ثقة قوية و اهو ما يشغل باله و يحاتي لان جذي بتنعدم الثقة و بتروح منه راحة البال..


أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه
بصراحة ما عندي راي اكيد الحين..يعني على حسب الظروف و على حسب الزوج..سالت هالسؤال من زوجة اخوي و اهي قالت اذا عملت يوم من الايام ما راح تعطيه الراتب بيده مباشرة لكن اذا كان في حاجة مشتركة بينهم كبناء منزل او حاجة للاطفال او بيتهم (يعني غير الاحتياجات الشخصية)فما راح تقصر و مستعدة تعطي كل راتبها لامور حياتهم المشتركة..لكن ان تعطيه بيده و اهو يتصرف على كيفه فلا..انا تقريبا رايي من رايها..


كيف ستعامل زوجة المستقبل يا أيها الرجل ؟ ,, وكيف تودين أن يعاملك زوجك يا أيتها المرأة ؟
اولا بكل احترام لان الاحترام اذا انعدم فكثير من الاشياء تنعدم..ثانيا الاهتمام الكبير..يعني الزوجة يجب ان تكون اول اهتمام في حياة الرجل و كذلك يجب على الزوج اخذ راي زوجته في الامور و مشاورتها..و المزح و الضحك و الدلال بين الزوجة و الزوج شي مهم و ضروووري يمكن وايد ناس ينسونه مع الايام..عمووما الريال الي يخاف ربه يصون زوجته و يحسن تعاملها ..فاهم شي التزام الرجل و اخلاقه و بس...

اشكرك اخوي متيم ب علي على الموضوع و انشاءالله نشوف راي الباقي علشان نستفيد اكثر:)

[اسرار الليل]

أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

انا اللي اشووفه مافيهاا شي اذا المره اشتغلت مع الريايييل

اذا كانت بنيه ماشيه عدل ومايهمها فلان وعلان فـ ماينخاف عليهاا

ولازم الريال يثق في زوجته

اما اللي موو واثق هذا شي ثااني

لا يقول غيره وماا غيره مثل بعض الناس :p

يعني اللحين بس الشغل فيه ريايييل ؟ كل مكان في ريااييل اشمعنى بس يات الغيره على الشغل ؟




وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟

اذا هوو عارف اخلااقها وعاارف اسلووبها

ماله داعي يضيق خلقه او يتضايق

واللحين نص الرياييل يبون المره تشتغل عشان هي اللي تصرف على البيت




أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه .

بـ النسبه للزوجه لا ما اوافق ان يكون راتبهاا عند زوجهاا

اصلا المفروض تخش راتبهاا وزوجها هو اللي يصرف عليها :D

لان هو المسئوول عنهااا



وكيف تودين أن يعاملك زوجك يا أيتها المرأة ؟

اذاا تزوجت اهم شي عندي يعاملني

بـ احترااام

لان لمن يحترمني ااناا احترمه




ووويعطيك العافيه عـ الموضوع الحلووو

[بو يعقوب]

السلام عليكم من الصبح

:p




انا اللي اشووفه مافيهاا شي اذا المره اشتغلت مع الريايييل

اذا كانت بنيه ماشيه عدل ومايهمها فلان وعلان فـ ماينخاف عليهاا

ولازم الريال يثق في زوجته

اما اللي موو واثق هذا شي ثااني

لا يقول غيره وماا غيره مثل بعض الناس

يعني اللحين بس الشغل فيه ريايييل ؟ كل مكان في ريااييل اشمعنى بس يات الغيره على الشغل ؟

واخيرا :p

اي بس الشغل فيه رجال

بتقعد معاهم جم ساعة


بعدين السالفة ماتعتمد على الثقة

انا لو تضمنون لي شيئين ما امانع من شغلها في مكان مخلوط

1-عدم وقوع الحركات العفوية للمرأة اللي تهتك بعض من الستر

2- ان الرجال يكونون شرفاء 100%

الاول احتمال 20% يحصل

اما الثاني احتمال 0% يحصل

مستحيييييييييييييل



(يا نساء النبي لستن كاحد من النساء ان اتقيتن فلا تخضعن بالقول فيطمع الذي في قلبه مرض وقلن قولا معروفا )


(يا ايها الذين امنوا لا تدخلوا بيوت النبي الا ان يؤذن لكم الى طعام غير ناظرين اناه ولكن اذا دعيتم فادخلوا فاذا طعمتم فانتشروا ولا مستانسين لحديث ان ذلكم كان يؤذي النبي فيستحيي منكم والله لا يستحيي من الحق واذا سالتموهن متاعا فاسالوهن من وراء حجاب ذلكم اطهر لقلوبكم وقلوبهن وما كان لكم ان تؤذوا رسول الله ولا ان تنكحوا ازواجه من بعده ابدا ان ذلكم كان عند الله عظيما )

اذا كانت المراة فيها براءة وعفوية

الرجال مو موجود عنده هالشي

اقل شي يلاحظه واقل شي يحركه






======================
بعض الشغلات تتطلب ان المراة تكون جميلة:)
======================


بـ النسبه للزوجه لا ما اوافق ان يكون راتبهاا عند زوجهاا

اصلا المفروض تخش راتبهاا وزوجها هو اللي يصرف عليها

لان هو المسئوول عنهااا

هذا اعدل شي قلتينه :p

[أم البنين]

موضوع جدا مميز وطرح رائع ولى وجهة نظر احب ان اعبر عنها
ولكن لى عودة لرد على الموضوع بعد الا منتحانات ان شاء الله ولا يمكننى الرد لضيق الوقت

[بو يعقوب]

موضوع جدا مميز وطرح رائع ولى وجهة نظر احب ان اعبر عنها
ولكن لى عودة لرد على الموضوع بعد الا منتحانات ان شاء الله ولا يمكننى الرد لضيق الوقت


ننتظر ردك على احر من نار جهنم

:p

لو انا مكانش اتقاعد من التدريس

[اسرار الليل]

اي بس الشغل فيه رجال

بتقعد معاهم جم ساعة


خوو هي بتشتغل مو تستعرض :p

وصدقني لو انت واثق فيهاا حييل راح تخليها عند 100 واحد عادي


مثل اللحين اللي طالعين لنا هبه

يبوون مرتهم لازم تشتغل بـ المدرسه

غير المدرسه لأ :/

يعني اللي تشتغل بـ المطار والا بـ الجمارك ماراح تتزوج ؟ :D





-عدم وقوع الحركات العفوية للمرأة اللي تهتك بعض من الستر

2- ان الرجال يكونون شرفاء 100%


:D

عيل خل مرتك بـ البيت ابرك لهاا :p

[بو يعقوب]

عيل خل مرتك بـ البيت ابرك لهاا

والله العظيم

وقرن في بيوتكن

هذا كلام الرجال

والنعم

:p



يعني اللي تشتغل بـ المطار والا بـ الجمارك ماراح تتزوج ؟

اكا طلعتي تفهمين

عجل ليش الحق مع علي يقول غير جدي:p

لاتنسين المضيفات اللي في الطائرة

بس لاتخافين الحين الرجال ماعندهم غيرة

هذا يعني انهم يتزوجون اي وحدة



وصدقني لو انت واثق فيهاا حييل راح تخليها عند 100 واحد عادي

مو سالفة ثقة

السالفة هي


1-عدم وقوع الحركات العفوية للمرأة اللي تهتك بعض من الستر

2- ان الرجال يكونون شرفاء 100%

:p

try again

الاسايمنت مال الهاردوير سةاني مجنون

هالاستاذ اللي اسئلته غلط


بس بعد حليتهم

[kuwaitiya]

بسم الله الرحمن الرحيم

اللهم صلي على محمد وعلى آل محمد

شكرا لك أخوي الفاضل متيم ب علي على موضوعك الجميل

أما تعليقي أهو:


أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه .

طبعا بالنسبه لي هذا الشي عادي دام إن ماراح يقصر علي ، وكفايه إن إسمه زوجي يعني لازم أساعده ولي حتاج فلوس ما أصر معاه ، والحياه الزوجيه لازم تكون تعاون



ماهو تفكيركم بهذا الشأن وماهو جوابكم ؟ .. وهل سيكون هناك نتائج سلبية ( حسب تفكير الرجل و المرأة ) ؟
لا ليش يكون هذاك أشياء سلبيه دام إحنا متفاهمين ومتعاونين



وكيف تودين أن يعاملك زوجك يا أيتها المرأة ؟
أبيه يعاملني بحنان ومايعصب علي لسبب تافه
ويكون إنسان دين ومايرضى بالغلط
ولما أحتاجه ألقاه يمي ويكون لي السند بكل الأوقات :)

[بو يعقوب]

السلام عليكم

مولانا متيم ب علي

وينك

انا لازم اششوف رايك :)

يهمني رايك

[متيم ب علي]

تامرني أمر أخوي سيد فاضل ,, جم سيد عندنا بالمنتدى :)

بسم الله الرحمن الرحيم
اللهم صلي على محمد وعلىآله الطيبين الطاهرين وعجل فرجهم ياكريم

السلام عليكم ورحمة الله و بركاته
أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

الصراحة هالشي بيكون وايييد صعب علي لأنه غيرتي ماتسمح كلش ,, بس شسوي .. مثل مايقولون بالمثل ,, الريل طويلة و الأيد قصيرة ,, مابيدي شي ( المثل يمكن يكون غلط لأني مو حافظة عدل :D )
لازم الزوجة تشتغل بعد عشان نقدر نقوم بأمور البيت ..


وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟

الصراحة بيترتب على هالشي عدم راحة بالي و أحاتي زوجتي من الناس اللي مايخافون الله وماعندهم غيرة وعينهم ماتخلي خلق الله بحالهم ,,


أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه .

أنا الصراحة أخلي الكرت عندي و أطلب هالشي من زوجتي ,, لأنه الحريم يفسفسون بالفلوس وايد ,, ويخلون زوجهم حافي منتف ..
تصدقون البدلة الوحدة يشترونها بالخمسين دينار و يلبسونها مرة وحدة بس و بالعيد ؟

و المشكلة لما تقولهم أشترو هالبدلة .. يقولون لأ .. هذي مو حق عيد !! .. هذي حق طلعة وبس .. ماعندك ذوق ! :(

شتقولهم ؟ .. مال ألبس زوجتي عباية جتف وتحتها بجامة .. والفلوس تبقى عندي عشان أقوم بأمور البيت بكل حكمة و عقل :)


المهم
ماهو تفكيركم بهذا الشأن وماهو جوابكم ؟ .. وهل سيكون هناك نتائج سلبية ( حسب تفكير الرجل و المرأة ) ؟

ما أشوف أي نتايج سلبية دام إنه الكرت عندي و مابقصر على زوجتي أي شي تبيه بعقل ..


كيف ستعامل زوجة المستقبل يا أيها الرجل ؟ ,, وكيف تودين أن يعاملك زوجك يا أيتها المرأة ؟


الصراحة أمشيها بعقل .. ما أمشيها بعاطفتي لأنه مابيمشون إلا بالعين الحمرة .. و الحرمة لازم الواحد يسايسها .. ما أشد الحبل عليها عشان لا تنزنط و تموت .. وما أرخيه عليها عشان لا تصير مثل الثور الهايج و أفقد السيطرة عليها ..

الحرمة مثل الحصان الهايج .. لازم اللي يروضها يكون صاحب خبرة بترويض الجياد و الثيران الثائرة وهكذا .. (( بس مو كلهم ولكن أغلبهم )) ..

و المشكلة الحريم يحبون هالشخص اللي يمشيهم بهالطريقة ..
إياني و إياكم يا رياييل هالزمن تحاولون تمشون مع الحريم عن طريق العاطفة .. إمشو معاهم بعقل و بسسسسس .. وسلامتكم :)

[أريج الورد]

مال ألبس زوجتي عباية جتف وتحتها بجامة ..
هههههههههه


الصراحة أمشيها بعقل .. ما أمشيها بعاطفتي لأنه مابيمشون إلا بالعين الحمرة .. و الحرمة لازم الواحد يسايسها .. ما أشد الحبل عليها عشان لا تنزنط و تموت .. وما أرخيه عليها عشان لا تصير مثل الثور الهايج و أفقد السيطرة عليها ..

الحرمة مثل الحصان الهايج .. لازم اللي يروضها يكون صاحب خبرة بترويض الجياد و الثيران الثائرة وهكذا .. (( بس مو كلهم ولكن أغلبهم ))

مادري ليش اخوي هالتفكير السلبي الي ماخذه عن الحريم...
ترة حتى الرياييل فيهم عيوووب الدنيا و الحريم ساكتين لانهم مساكين ما بيدهم حيلة...واذا تحجوا كلمة بيسمعون الف...

نصيييحة اخوي..على قولتك رخ الحبل اشوي..ترة الدنيا للحينها بخير..

على كل حال الله يعين زوجتك هههههه
و ترة معلومتك ان الحريم يحبون هالطريقة غلط..الحريم نقطة ضعفهم العاطفة و بالكلمة الحلوة يمشون على كلام ريلهم و بكل اقتناع بعد..

[متيم ب علي]

هلا والله أختي عاشقة أبا الفضل العباس عليه السلام ,,

أختي لازم الريال شوية يشد على زوجته عشان تفكر شوية .. أكو بنات حسبالهم الزواج كله لعب و وناسة و أحلام وردية على قولتهم .. وهالشي غلط ..
خو الزواج مسؤولية كبييرة بس محد يقدر .. وبنات هالزمن عقلهم صغير تقريباً .. باجر وراهم عيال و بيصيرون أمهات .. شلون بيربون الولد دام إنه همهم وناستهم ؟

لازم الحبل مايكون مشدود وايد ولا يكون راخي .. لأنه لو شديته عالزوجة آخر شي مرده الحبل بينقطع .. ولو أرخيته حقها بصير سكانه مرته مثل مايقولون ..

والحريم نقطة ضعفهم العاطفة مثل ماقلتي وهالشي أنا عارفة .. بس المشكلة الحريم حسبالهم إنه الريال نقطة ضعفه العاطفة هم .. و أهمه أغلب المرات لو بيطلبون طلب من الريال يدخلون عليه من هالباب .. وهالشي وايد غلط .. عدل ولا لأ ؟

أنا كشخص لو زوجتي تبي شي .. لازم تطلبه مني بعقل أو تعطيني بمقابله شي .. مثلاً ..

لما تصير مشاكل أو خلافات بين الزوج و الزوجة .. الزوجة ما تفهم الكلام إلا لو دخلت عليها بطريج عاطفتها ( الأغلب ) .. أما أكو بنات يحبون يتفاهمون بعقل وما يحبون بوقت الجد أكلمهم بالعاطفة ( وهذا اللي أحبه ) ..

وسلامتكم ..

[أريج الورد]

أختي لازم الريال شوية يشد على زوجته عشان تفكر شوية .. أكو بنات حسبالهم الزواج كله لعب و وناسة و أحلام وردية على قولتهم .. وهالشي غلط ..
خو الزواج مسؤولية كبييرة بس محد يقدر .. وبنات هالزمن عقلهم صغير تقريباً .. باجر وراهم عيال و بيصيرون أمهات .. شلون بيربون الولد دام إنه همهم وناستهم ؟
بهذا انا وياك..صح بنات هالزمن اشوية دلوعات و عبالهم بيت الريل اهو نفس دلال بيت الابو و هالشي غلط..خصووووصا بمجتمعنا ,لكن الريال لازم يتفهم هالشي و ما يتوقع منها تكون امراة كااملة و ناضجة بمجرد دخولها بيت الزوجية..البنت راح تنضج مع الوقت..



والحريم نقطة ضعفهم العاطفة مثل ماقلتي وهالشي أنا عارفة .. بس المشكلة الحريم حسبالهم إنه الريال نقطة ضعفه العاطفة هم .. و أهمه أغلب المرات لو بيطلبون طلب من الريال يدخلون عليه من هالباب .. وهالشي وايد غلط .. عدل ولا لأ ؟
بصراحة مادري...


لما تصير مشاكل أو خلافات بين الزوج و الزوجة .. الزوجة ما تفهم الكلام إلا لو دخلت عليها بطريج عاطفتها ( الأغلب ) .. أما أكو بنات يحبون يتفاهمون بعقل وما يحبون بوقت الجد أكلمهم بالعاطفة ( وهذا اللي أحبه ) ..
اكيد كل شي بوقته..بس ترة الكلام الحلو و الرخاء مطلوب داايما..حتى بالنقاشات و على قولتك المسائل العقلية و المنطقية لان هاذي حياة زوجية و الي قاعدين يتكلمون و يتناقشون ريال و زوجته مو تلميذ و مدرس:)
و شكرا:)

[بو يعقوب]

موضوع جدا مميز وطرح رائع ولى وجهة نظر احب ان اعبر عنها
ولكن لى عودة لرد على الموضوع بعد الا منتحانات ان شاء الله ولا يمكننى الرد لضيق الوقت


:)

[أم البنين]

قبل أن أبدا بالرد على أسألتك
أشكرك على الموضوع لأنه موضوع جدا حلو ومن واقع الحياة
والآن نبدأ بلإجابه على الاسئله



أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟


للأسف ان الرجل فى هذا الزمن أول ما يفكر يتزوج يقول انا ابغيها تشتغل والقله القليل الذى يرفض عمل المرأة
من وجه نظري انا لأاويد عمل المرأة اذا كان الزوج يقدر ان يضمن لزوجته العيش الكريم
فما احلى ان تكون المرأة ربه بيت تستقبل زوجها بكل رحابه صدر وشوق وحنان بعد عودته من عمله مجهد ومتعب
تسقبله بابتسامة وترحيب
تربى أطفالها وتكون لهم الحضن الدافئ ولا تعتمد على اى كان فى تربية ابناءها فلاذات كبدها

أما لو أضطرت المرأة لتعمل لظروف الحياة القاسية فأنا افضل ان يكون مكان العمل غير مختلط
أو ان يكون مجال العمل به اقل عدد من الرجال وان اضطرت اضطرار يكون هناك طبعا حدود مع كلامها ومعاملتها لرجل



وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟

بصراحة حصلت كذا شغلة كانت مختلطة كسكرتيرة وما شابه حيث يكون الشغل فيه مختلط لكنى لم ارتح للفكرة لأنى احس انى ما راح اخد حريتى ابدا خصوصا انا ما اعرف اتكلم مع الرجل بدون مجاملة او كذب عندى جدا صعبه لذا فضلت ان اجلس فى البيت وادرس على انه التدريس وجع قلب وهم وعوار راس بس اهون عندى


أيتها المرأة : في حال إذا عملت بأي عمل ( هل ستقبلين أن يكون الراتب الذي تقبضينه بيد زوجك ) ؟ ,, علماً بأنه ماراح يقصر عليج الزوج بأي طلب تبينه .


لا أقبل
انا اشوفها مو حلوه اصلا من الرجل ان يستلم راتب زوجته ويعطيها بالقطارة
الزوجة التى تحب زوجها واتشوف زوجها محتاج راح اتساعدة من غير ما يطلب منها وبطيب خاطر
وفعلا اهم شئ ان الزوجه ما تحسس زوجها انها تتفضل عليه بهذا العمل او لمن اتصير مشادة بينهم تمن عليه وتعيره
لأن هذا يهدم علاقة الود بينهما



كيف ستعامل زوجة المستقبل يا أيها الرجل ؟ ,, وكيف تودين أن يعاملك زوجك يا أيتها المرأة ؟

بكل حب وحنان وبكل احترام وتقدير لأن اساس الحياة الزوجية الاحترام والتقدير
سأكون له الزوجه والاخت والصديقة خصوصا لمن ايكون يقدس الحياة الزوجيه


متيم بعلى موضوع جدا رائع ولى عودة لتعليق على كلامك ووجهة نظرك بخصوص هذا الموضوع

[كَرْبَلائِيَ]

تامرني أمر أخوي سيد فاضل ,, جم سيد عندنا بالمنتدى

يا كثرهم ما شاء الله الله يزيدهم :)



أيها الرجل : هل تقبل عندما تتزوج أن تعمل زوجتك في مكان مخلوط بين الرجال و النساء ( أي بأنّ هناك رجال سيتحدثون مع زوجتك بمكان العمل ) ؟

وفي حال قبولك ( هل سيترتب على هذا الأمر أي نتائج أخرى عليك ) ؟ ,, مثل عدم راحة البال و يضيق خلقك ؟


اولا عزيزي هناك اسباب ولازم نطلعه بأول

كمثال لو قلنا لا ما يصير انزين بهذا الزمن لايوجد مكات عمل خالي من الرجال والعكس

وثانيا يعتمد على زوجتك هل هي مؤدبه هل هي ذو اخلاق عالية هل هي متلزمه ولو بشي بسيط وان كان بينه وبين الموظفين كلام 100% سوف يكون بخصوص العمل وحتى لو كان خارج العمل يكون الكلام بسيط وكما نقوله س و ج

افرض انته مكان زوجتك وهناك موظفات معك في العمل ؟


بكل صراحه انا من الاشخاص المتزوجين وزوجه تعمل بمكان عام وهناك خلط بين الرجل ونساء ولكن الحمدلله

هذا الشعور لا يأتي بتاتا والسبب ان لي ثقه كامله به واعرفه جيدا واعرف ماذا هي تريد مني وانا ماذا اريد منها

هذا برايي دائما تحسس الزوجه وتعطيه الثقه العميويه وفي نفس الوقت تراقبه وتراقب تحركاته

لا اقصد بأني ارقبه يعني اشك فيه او ان قلبي غير مطمأن لا القصد من المراقبه هي عند دخوله المنزل وتكون انته من

يستقبله بحب وتعاطف وكلام جميل يجلعه تحس وتقول في من يحس به وفي نفس الوقت تسأله ماذا فعلتي اليوم

وكيف كان العمل و و و و دائما البنات وبهذه الامور تكون عندهم طلاقه في الكلام وطلع كل لي قلبه :) انته اهني تصيد

الزين وشين وللعلم الزوجه تتبع زوجه اذا كان زوجه في قمة التفاهم والهدوى واعطائها الثقه الازمه وجلعه تفتخر بنفسه وزوجه

اما بنسبة للغلق و وتفكير و و و هذه الاشياء الحمدلله لا تدخل بعقلي لاني اعرف من هي زوجتي


شكرا لك مولانا

تحياتي

[Trai]

داشة عرض .. بس حبيت أصلح المثل لأخوي متيم .. :D

( العين بصيرة والإيد قصيرة ) ..

[بو يعقوب]

لا أقبل
انا اشوفها مو حلوه اصلا من الرجل ان يستلم راتب زوجته ويعطيها بالقطارة
الزوجة التى تحب زوجها واتشوف زوجها محتاج راح اتساعدة من غير ما يطلب منها وبطيب خاطر
وفعلا اهم شئ ان الزوجه ما تحسس زوجها انها تتفضل عليه بهذا العمل او لمن اتصير مشادة بينهم تمن عليه وتعيره
لأن هذا يهدم علاقة الود بينهما


هذه هي

هالشغلة بعد تخوف

علشان جدي

لازم تكون مشاركة بين الزوجين


بصراحة حصلت كذا شغلة كانت مختلطة كسكرتيرة وما شابه حيث يكون الشغل فيه مختلط لكنى لم ارتح للفكرة لأنى احس انى ما راح اخد حريتى ابدا خصوصا انا ما اعرف اتكلم مع الرجل بدون مجاملة او كذب عندى جدا صعبه لذا فضلت ان اجلس فى البيت وادرس على انه التدريس وجع قلب وهم وعوار راس بس اهون عندى

زين سويتين والنعم


الله يساعدش على التدريس >>> يمرض

[HsHoOom]

اناما اشوف فيها شي اذا زوجتي تبي تشتغل عادي اذا انا واثق فيها واهي كله تبي تشتغل اشوي وترد البيت واصلا كل مكان فيه رياييل وحريم وانا اشوف الي ما يخلي زوجته تشتغل واهي تبي هالشي من وجهة نظري انه معقد . ومشكور اخوي على هالموضوع.